Поповски не е Генерален секретар, но ќе остане во ФФМ, повика за поддршка на неговата наследничка

Фудбалската федерација на Македонија вчера доби нов Генерален секретар, откако Наталиа Илиевска Божиновска го наследи Филип Поповски.

Поповски зад себе има два мандати, а сега се обрати до медиумите и повика за поддршка кон неговата наследничка.

„Дозволете да ви се заблагодарам на соработката во изминатите два мандати како Генерален секретар на Фудбалската федерација на Македонија.

Заедно постигнавме многу успеси, но и лоши моменти кои се дел од фудбалскиот свет.

Драго ми е што како мој наследник доаѓа колешката Наталиа Илиевска Божиновска за нов Генерален секретар. Тоа е во согласност со нашите цели опишани во Стратегијата за развој на женски фудбал и обезбедување на поголема родова еднаквост во Федерацијата. Ве замолувам да ѝ ја пружите истата поддршка како што ми ја пруживте и мене. Верувам дека со ова сме пример, не само кај спортските организации во државата, туку и во регионот.

Јас и понатаму останувам во Фудбалската федерација на Македонија, работејќи на започнатите проекти согласно стратешките планови.

Ви благодарам.

Со почит,

Филип Поповски,

Фудбалска федерација на Македонија“.