Се појави интересна теорија: Дали на Гана ѝ одговара пораз од Хрватска?

Во пресрет на последното коло од групната фаза на Светското првенство се појави интересна теорија која предизвика бројни коментари меѓу навивачите. Во центарот на вниманието се најде репрезентацијата на Гана, за која некои сметаат дека поразот од Хрватска можеби не е најлошото сценарио.

Црните ѕвезди влегуваат во последното коло со освоени четири бода по победата над Панама и нерешениот резултат со Англија.

Овие резултати практично им осигуруваат пласман во шестнаесетината финале, и покрај тоа што би завршиле на третото место во групата, бидејќи речиси сигурно би биле дел од осумте најдобри селекции на третите места.

Поради тоа, се појавија различни пресметки околу можниот развој на настаните во групата Л. Главната причина е скриена во Томас Парти.

Еден од најдобрите фудбалери на Гана поради правни проблеми во Велика Британија нема добиено виза за Канада, што значи дека не може да игра на натпреварите кои се одржуваат на канадско тло.

Фудбалската федерација на Гана се обиде да најде решение, но канадските власти не ја сменија својата одлука, а ФИФА не сакаше да се впушта во целиот случај.

Според актуелниот распоред на нокаут фазата, второто место во групата Л скоро сигурно води до натпревар во Торонто против второпласираниот тим од групата К.

Тоа значи дека Парти не би можел да им помогне на своите во таа средба.

Од друга страна, ако Гана заврши како третопласирана, првиот натпревар од нокаут фазата би го играле во Канзас Сити, каде што искусниот играч на средината на теренот би имал право да настапи.

Поради тоа, некои медиуми отворија прашањето дали на Гана, барем краткорочно, ѝ одговара подобро да заврши на третото наместо на второто место во групата.

Сепак, оваа пресметка има и значајна слабост. Во случај на понатамошен пласман, Гана би играла повторно во Канада уште во осминафиналето, што значи дека Парти не би можел да биде дел од тимот ни тогаш.

На други зборови, евентуалната “предност” би се сведувала само на еден натпревар.