Михајлов нов тренер на Вардар: Секој натпевар ќе биде како финале

Вардар денес и официјално го претстави новиот тренер, Горазд Михајлов.

Поранешниот тренер на Силекс во пролетниот дел од шампионатот ќе има мисија да обезбеди опстанок со „црвено-црните“.

ФК Вардар конечно ги доби парите од Град Скопје и ќе има помирна пролет, а Михајлов најави дека ќе се бори да го задржи клубот во елитата.

„Вардар е клуб на народот, најголемиот бренд во Македонија и така треба да се однесуваме кон него. Ветувам дека ќе го дадеме најдоброто со моите соработници, истото важи и за фудбалерите. Се нафативме да работиме и да ја оствариме целта. Секој од наредните 15 натпревари ќе биде како финале за нас, секој бод ќе ни биде важен и драгоцен. Целта е да обезбедиме опстанок, се нафатив на оваа работа бидејќи го познавам овој тим на Вардар. Двапати игравме со Силекс против нив изминатава есен и знам дека тимот поседува потенцијал“, изјави Михајлов.