Изненадување: Дали Себастијан Фетел најави заминување од Формула 1?!

Германскиот возач Себастијан Фетел порача дека би можел да ја напушти Формула 1 кога ќе му истече договорот со Ферари во 2020 година.

Фетел во текот на кариерата освои четири титули шампион во светот, но порачува дека овој спорт многу се променил во текот на годините и дека полека преминува во шоу.

Токму поради тоа смета дека неговиот труд е залуден.

„Сигурен сум дека сакам да бидам тука оваа и следната година, но не знам после тоа што ќе биде со правилата“, започна Фетел и додаде:

„Не знам што ќе биде со мене…Сигурно нема да седам тука и да размислувам како сигурно ќе возам за само да бидам дел од Формула 1. Многу работи се променија во последно време, Формула 1 сега повеќе е бизнис, повеќе е шоу отколку што е спорт. Тоа важи и за останатите спортови, но треба јасно да се каже – ако е шоу, тогаш нека биде шоу до крај. Имам впечаток дека трошиме премногу време, енергија и пари на скапи правила кои не се од корист на никого“, изјави Фетел.

Инаку Фетел во текот на кариерата освои 52 победи и дури 111 пати се искачи на победничкиот подиум.
Во првите две трки во новата сезона Фетел не успеа да оствари резултати какви што се очекуваа и во овој момент се наоѓа на петата позиција со 22 освоени бодови.