Јокиќ е третиот играч во историјата на НБА лигата со трипл-дабл просек. Нема да биде МВП?

НИКОЛА ЈОКИЌ стана третиот играч во историјата на НБА лигата кој во основниот дел на сезоната бележи трипл-дабл во просек. Српскиот центар на Денвер Нагетс со својата четврта асистенција во победата 117:109 против Мемфис Гризлис дојде до 700-та асистенција во сезоната и така обезбеди неговиот просек на асистенции да не биде помал од 10,0 по натпревар.

Јокиќ го заврши натпреварот против Мемфис со 26 поени, 13 скока и 16 асистенции, така што неговите просеци за сезоната сега изнесуваат 29,8 поени, 12,8 скока и 10,3 асистенции. Пред Нагетс е уште еден натпревар од основниот дел на лигата и Јокиќ повеќе не може да падне под просекот од 10,0 асистенции по вечер.

Со трипл-дабл просекот, тој стана само третиот играч во историјата на НБА лигата кој во трите најизразени статистични категории во кошарката бележи двоцифрени бројки. Пред него тоа го успеале само Оскар Робертсон и Расел Вестбрук. Сегашниот соиграч на Јокиќ ги имал овие просеци во четири сезони.

Синоќа Јокиќ стигна до 34-тиот трипл-дабл во сезоната и така ја потврди својата кандидатура за МВП наградата на крајот од сезоната. Досега трипати бил најкорисен играч во основниот дел на НБА лигата, а за оваа сезона неговиот најголем конкурент е Шеј Гилџес-Александер, играчот на Оклахома Сити Тандерс, кој игра со просеци од 32,7 поени, 5 скока и 6,4 асистенции.

Оклахома со сооднос на победи и порази 67-14 е најдобриот тим во НБА лигата, а Гилџес-Александер е најголем фаворит за МВП титулата.