Фудбалерите на Јунајтед одбија да носат јакна со боите на виножито

Клубови од англиската Премиер лига учествуваат во кампањата на Stonewall’s Rainbow Laces, која трае од 29 ноември до 5 декември, за поддршка на ЛГБТК+ вклучувањето во спортот. Меѓу другото, капитените треба да носат ленти со боите на виножито, но неколку играчи веќе одбија или го направија тоа со посебна порака.

Од друга страна, фудбалерите на Манчестер Јунајтед се договорија да не ги носат јакните со боите на виножито, кои беа направени специјално за оваа кампања.

Веста прв ја објави The Athletic, а набрзо ја пренесоа и други англиски медиуми. Како што пишуваат, се работи за поддршка на соиграч.

Дефанзивецот на „Црвените ѓаволи“, Нусаир Мазрауи е муслиман и од религиозни причини не смее да ја носи споменатата јакна. Фудбалерите на Јунајтед велат дека не сакаат да го доведат Мароканецот во непријатна ситуација, да го издвојат, па ја отфрлаат идејата заедно да носат такви јакни.