Вирц пред завршницата на сезоната: Им должиме на навивачите пласман во Лига на шампиони

Фудбалерите на Ливерпул имаат обрска кон клубот и кон своите поддржувачи да обезбедат место во Лигата на шампиони за наредната сезона, изјави фудбалерот од средниот ред, Флоријан Вирц, неколку дена по неуспехот на неговиот тим да го елиминира Пари Сен Жермен во четвртфиналето на највисокото европско натпреварување.

Задачата на тимот под водство на Арне Слот до крајот на сезоната е да заврши меѓу најдобрите пет, со што ќе обезбеди учество во Лигата на шампиони и следната сезона. В недела, „црвените“ ги очекува Мерсисајд дерби натпревар против Евертон.

– До крајот на сезоната сме целосно сконцентрирани на првенството. Пласманот во Лига на шампиони е нашата главна цел. Тоа го должиме на клубот, го должиме и на навивачите. Ќе вложиме максимален напор, како што беше и против Пари Сен Жермен. Нашиот минимален праг за оваа сезона е петтото место – изјави Флоријан Вирц.

Тимот од „Енфилд“ моментално се наоѓа на таа позиција со предност од четири бода пред Челзи, а остануваат уште шест кола до крајот.

– Против Пари Сен Жермен се обидовме сè што можевме. Атмосферата на стадионот беше извонредно гласна, и навивачите заслужуваат честитки за тоа. Почнавме со полн елан од првата минута, но голот кој ќе ја пресврти ситуацијата, не дојде. Во фудбалот така функционира, ако не ги постигнуваш головите, тешко можеш да победуваш. Требаше да надокнадиме два гола, а за таква ситуација ни беше потребен еден во првото полувреме. Не успеавме. Тешко беше да создаваме шанси, иако во вториот дел имавме повеќе, на крајот не успеавме. Да, гневни сме, но потребно е да се преориентираме и да гледаме напред – заклучи германскиот репрезентативец.