Поранешен играч искрено за периодот во Барселона: Не сакав да комуницирам со никого!

Самуел Умтити започна ново поглавје откако реши да ја заврши својата професионална фудбалска кариера, која беше исполнета со искачувања на врвовите и падови кои бараа големи напори.

Поранешниот играч на Барселона и репрезентативец на Франција, кој ги закачи копачките оваа сезона поради честите повреди на колената, отворено сподели за предизвиците кои го присилија на предвремено пензионирање.

На 31 годишна возраст, живее во Париз, Умтити се потсети на неговиот период во Каталонија во неодамнешно интервју дадено за италијанската „Газета“.

Иако неговиот престој во Барселона беше најуспешен дел од кариерата, тој признава дека бил и период на сериозна изолација.

Во Барселона се чувствував многу осамено. Не сакав да разговарам со никого. Ако не сте во добро психолошко здравје, телото не може да ви функционира оптимално, а тоа влијае на вашата игра, изјави Самјуел Умтити.

Во јули 2016 година, Умтити се приклучи на Барселона од Лион и брзо изгради репутација како еден од врвните дефанзивци во Европа.

Во текот на шест сезони, одигра 134 натпревари, освојувајќи две Ла Лига титули и три Копа дел Реј. Неговата кариера достигна врв во 2018 година кога играше клучна улога во победата на Франција на Светското првенство во Русија.

Сепак, овој триумф брзо беше проследен со голем пад. Хроничните проблеми со колената го следеа низ кариерата и значително го намалија неговото време на терен и влијанието во клубот. Умтити објасни дека недостатокот на постојана поддршка и играчки можности ги влошија проблемите.

Позајмицата во италијанскиот Лече во 2022 година се покажа како клучен момент за него лично. Емоционалната публика на аеродромот му овозможи нов почеток по години фрустрации.

„Не сум личност што многу зборува; срцето ми зборува подобро од устата. Тие солзи дојдоа директно од срцето. Ми требаше искрена љубов, и ја најдов во првиот момент во Лече.“

Призна дека првично бил скептичен кон премин, но спортскиот директор на Лече, Панталео Корвино, го увери дека тоа ќе биде вистинскиот потег.

„Ми рече дека ќе се вљубам во луѓето и градот. Не бев посигурен, но тој беше во право. Се создаде многу силна врска.“

По времето поминато во Италија и последователниот престој во Лил, Умтити го заврши минатото лето без клуб. Непрекинатите проблеми со колената го натераа на предвремено пензионирање оваа сезона.