Ливерпул го плати 150 милиони евра, сега е под критика: „Непрофесионален е“

Новото засилување на Ливерпул, Александер Исак, кој стана најскапиот трансфер на клубот, се најде на удар на критики поради методите кои ги употреби ова лето за да се одвои од Њукасл.

Шведскиот репрезентативец практично одби да тренира со Њукасл за да го обезбеди својот премин во редовите на актуелните прваци на Премиер лигата, што на крајот му успеа на последниот ден од преодниот рок, во трансфер вреден 150 милиони евра. Неговото однесување беше остро критикувано од страна на поранешниот играч на Ливерпул, Дон Хатчисон, пренесува Goal.com.

Долга летна сага

Со потпишувањето на Исак за Ливерпул заврши долгата летна трансфер сага за време на која напаѓачот правеше сѐ за да го напушти Њукасл. Поради желбата за трансфер, ги пропушти клупските подготовки и воведните натпревари во сезоната, а во еден момент дури и тренираше самостојно. Подоцна, Исак ги обвини Њукасл за „неисполнети ветувања“ во врска со неговата иднина, што беше негирано од клубот.

Дон Хатчисон без двоумење го коментираше однесувањето на Исак за onlinecasino.com: „Без сомнение беше непрофесионален. Александер Исак требаше да биде поодговорен во текот на летото, а сега ја плаќа цената за тоа. Требаше да ја согледа пошироката слика. Напуштањето на кампот беше лош потег, а кога се врати, требаше да размислува за две опции: или да замине во Ливерпул или да остане во Њукасл. Во секој случај, мораше да биде подготвен за натпреварите.“

Хатчисон додаде: „Не требаше да биде себичен. Требаше да тренира со Њукасл дури и ако знаеше дека ќе успее да си замине. Ако трансферот не се случеше, ќе беше подготвен за игра. Беше непрофесионално и наивно не само да престане да работи, туку и да ја жртвува својата физичка кондиција. Мислам дека неговиот агент го советуваше многу лошо во текот на целото лето.“

На крајот, сето тоа се сведува на играчот. Тој е под договор со Њукасл и им должи подготвеност и професионален однос. Гледајќи на пошироката слика, ако завршиш во Ливерпул, мораш веднаш да успееш да го дадеш најдоброто од себе. Сега се обидува да го надомести пропуштеното, што е последица од неговото однесување.“