Видео: „Црвената армија“ на Клоп незапирлива, неверојатен пресврт на Арсенал

Големото дерби на „Стенфорд Бриџ“ му припадна на Ливерпул, кој продолжува со максималниот ефект. Арсенал дојде до неверојатен пресврт против Астон Вила.

Ливерпул дојде до водство уште во 14-та минута со фантастичниот гол на Александер-Арнолд. Десетина минути подоцна Аспиликуета израмни, но судијата во консултација со ВАР го поништи голот.

Веќе во 30-та минута после еден слободен удар Фирмињо беше највисок во скокот и погоди за 2:0, резултат со кој се отиде на полувреме.

Во второто полувреме гледавме голема борба, израмнет фудбал, со шанси на двете страни. Канте во 70-та минута намали на 2:1, но „сините“ немаа сили да го избегнат поразот.

Арсенал стигна до фантастичен пресврт и победа од 3:2 против Астон Вила. „Топџите“ одиграа многу лошо прво полувреме, најпрво во 20-та минута Џон Мекгин погоди за водство на гостите, а десетина минута подоцна Мејтланд-Најлс доби црвен картон, па останаа со играч помалку.

Никола Пепе израмни од пенал во 59-та минута, но само две минути подоцна Астон Вила повторно го врати водството. Во последните десет минути Чемберс и Обамејанг погодија за голема победа на Арсенал.