Сари не е загрижен што Жиру веќе 13 натпревари не постигна гол за Челзи

Тренерот на Челзи, Маурицио Сари изјави дека не е премногу загрижен поради фактот што напаѓачот на оваа екипа, Оливие Жиру веќе 13 натпревари не постигна гол.

Жиру во Челзи пристигна на почетокот на оваа година од Арсенал, но ефикасноста во овој клуб и не му е на завидно ниво. Францускиот напаѓач веќе 13 натпревари не постигна гол и очигледно е дека Челзи веројатно во Жиру и Мората има напаѓачко дуо кое е најмалку „расположено“.

Меѓутоа, италијанскиот стратег изјави дека не го загрижува голгерерскиот пост на Жиру и дека е задоволен од игрите на овој напаѓач. Жиру во досегашниот дел од сезоната запиша четири асистенции и за него тоа е поважно од головите.

„Пред месец дена зборувавме дека сме загрижени што играчите за врска не постигнуваат голови, а сега почнаа тоа да го прават. Во три натпревари Баркли даде два, а Лофтус три гола. Ако продолжиме вака да играме сигурен сум дека и напаѓачите ќе проработаат. Не сум премногу загрижен поради нив, бидејќи тие доприносуваат многу со своите игри. Жиру во сезоната не постигнува многу голови, но работата која ја прави на теренот е неверојатна“, изјави Сари.