Ѓоковиќ воодушевен од млад Бразилец: Во него гледам дел од мојата игра

Најдобриот тенисер на сите времиња, Новак Ѓоковиќ, се пласираше во третото коло на Австралија Опен, откако го совлада квалификантот од Португалија, Жаиме Фарија, во втората рунда.

Квалификантот даде добар отпор против десеткратниот шампион на Австралија Опен, но Србин на крајот славеше со 3:1 во сетови (6:1, 6:7, 6:3, 6:2). Мечот траеше точно три часа.

По победата против Фарија, Новак го пофали уште еден млад тениски талент – Жоао Фонсека од Бразил, кој успеа да направи сензација и да го елиминира Андреј Рубљов во пет сета.

„Всушност, го запознав пред пет минути. Му честитав, не само за победата што ја гледав против Андреј Рубљов, всушност само последниот сет стигнав да го гледам, туку и за сè што работи веќе шест месеци или една година. Го следам неговиот подем, негов сум фан. Ми се допаѓа како е храбар, удира чисто, можам да кажам дека е ‘олраунд’ играч“ рече Новак, па додаде:

– Бразил е огромна земја и добро е за тенисот да имаме играч кој доаѓа од таа земја. Не сме имале играч од тој калибар уште од славниот Гуга Куертен. Тоа е добро секако за целиот спорт. Толку млада личност да игра толку добро. Го следам, реков веќе дека во него гледам малку и од мојата игра, особено кога бев на негови години, игра на начин што во секој поен покажуваш што имаш, без никакво стеснување. Има храброст и тоа го покажа против Рубљов, така што иднината му е светла ако продолжи вака.