Ѓоковиќ: Имам изливи на бес, но тоа е дел од мене

Во дуелот со Жаиме Фарија во второто коло на Австралија опен, на Новак Ѓоковиќ му излетаа неколку пцовки, имаше и моменти на бес, а освојувачот на 24 гренд слем титули вели дека и тоа е дел од него, иако тоа не е пораката што би сакал да ја испрати во јавност.

„Постојат универзални кодекси на однесување, правила и вредности за кои сите се залагаме во спортот и пораки што сите се обидуваме да ги испратиме со нашите настапи, но и со начинот на кој зборуваме, како комуницираме со публиката, посебно со младите луѓе кои најмногу ми значат“, вели Ѓоковиќ и додава:

„Тешко е секогаш да си во идеална, оптимална состојба, и психичка и емотивна, постојано да се претставуваш на вистинскиот начин. Свесен сум дека често не се претставувам себе си на најдобар начин. Често имам изливи на нервоза и бес на теренот што не ги сакам, но тоа сум јас. Тоа се работи со кои и јас се борaм, на моето ниво. Независно од тоа што сум одиграл над 1.000 мечеви и колку турнири досега, што имам искуство… Знам дека понекогаш работите ќе се повторат, едноставно – човек си од крв и месо и тогаш кога си под притисок, нешто што не сакаш – излегува. Тоа е моја лекција и животен пат што си го креирам. Се обидувам да бидам подобра верзија на себе“.