Maнчини призна дека имал двоен договор со Сити: Тоа не е мој проблем

Роберто Манчини за првпат јавно проговори за неговиот договор со Манчестер Сити по објавувањето на пресудата во големиот финансиски случај поврзан со клубот. Селекторот на италијанската репрезентација изјави дека имал “двоен договор”, додавајќи дека тоа не го гледа како свој проблем.

Манчестер Сити беше прогласен за виновен за преку сто точки од тужбата покрената од Премиер лигата за прекршување на финансиските правила. Казната сè уште не е определена, а клубот и понатаму ги негира обвиненијата и најавува жалба. Клубот од почетокот ги отфрла обвинувањата.

Манчини беше запрашан за случајот на конференцијата за медиуми пред настапот на италијанската репрезентација во Лигата на нации во Турција. “Тоа не е прашање кое се однесува на мене. Сепак, ова не е ништо ново, бидејќи навистина се повторува на секои четири или пет години. Манчестер Сити не е виновен, а фактот што имав два договора не е мој проблем, туку можеби нивни”, изјави Манчини.

Последниот дел од неговата изјава привлече големо внимание во британските медиуми. Премиер лигата уште во февруари 2023 година изнесе дека Сити во периодот од 2009/10 до 2012/13 наводно не ги објавувал целосните податоци за платите на своите тренери. Ова го опфаќа целото време на Манчини во клубот.

Приказната за двата договора првпат беше објавена во 2018 година. Германскиот “Der Spiegel”, базирајќи се на документи од скандалот Football Leaks, објави дека Манчини покрај договорот со Манчестер Сити имал и посебен договор со клубот Ал Џазира од Абу Даби, кој е поврзан со сопственикот на Сити, шеикот Мансур.

Според објавените документи, Манчини имал основна годишна плата во Сити од околу 1.45 милиони фунти, а за консултантска работа во Ал Џазира требало да добива дополнителни 1.75 милиони фунти годишно. Парите, според наводите, биле исплаќани преку посебна компанија. Години на ред, Сити ги отфрлаше интерпретациите на протечените документи и негираше прекршување на правилата.

Овој случај стана значаен дел од многу поширока истрага. Премиер лигата теретеше дека Сити пријавувал неточни финансиски податоци, не ги објавувал целосните плати на играчите и тренерите, кршел финансиски правила на УЕФА и англиската лига, како и дека не соработувал во текот на истрагите.