Maкедонскиот репрезентативец Ненад Димитријевиќ одигра одличен натпревар во дресот на Уникс Казан против Партизан.
На првиот голем настап Димитријевиќ ги освои симпатиите на навивачите на клубот, но и на луѓето во една од најсилните кошаркарски лиги во регионот, ВТБ лигата.
Уникс Казан вчера го освои 3-тото место во ВТБ Суперкупот откако во малото финале го победи белградски Партизан со 83:77. Димитријевиќ натпреварот го заврши со фантастични 30 поени, па затоа сосема заслужено и беше прогласен за играч на мечот од ВТБ.
Големото задоволство од одлично одиграниот натпревар не го криеше и Димитријевиќ кој по натпреварот откри дека му се исполнил сонот да го запознае Обрадовиќ.
„Нема што да кријам, од мали нозе сум за Партизан. Мојот дедо навиваше за Партизан, исто и мојот татко, поради што ова беше специјален меч за мене. Запознавањето со Жељко (Обрадовиќ) беше остварување на детскиот сон за мене.
Има разлика во лигите во Шпанија и Русија, но фокусиран сум на напредокот, личниот и тимскиот. Очекувам да бидам лидер, сакам да покажам дека можам да помогнам на теренот“, изјави популарниот Нено.
Учество во игри на среќа е дозволено за лица со 18+ години. Играј одговорно!