Изненадување во Мелбурн: Димитров остана без полуфинале

Бугарскиот тенисер Григор Димитров на изненадување е поразен во четвртфиналето на Австралија Опен од Британецот Кили Едмунд со 3:1 во сетови.

Димитров како трет носител на турнирот беше фаворит во дуелот со 49. тенисер на светот, но на теренот не ја оправда таа улога и на крајот  во четвртфиналето мораше да се опрости од првиот Гренд Слем оваа сезона.

Кили Едмунд веднаш на стартот на натпреварот направи брејк и поведе со 2:0, но Димитров се врати и израмни на 3:3, а потоа и поведе со 4:3. Британецот во деветиот гејм го прави својот втор брејк, а потоа во последниот гејм на првиот сет спасува три брејк топки и го освојува за водство од 1:0 во сетови.

Вториот сет му припадна на Димитров, кој го доби со 6:3 и израмни на 1:1 во сетови. Третиот сет му припадна на Едмунд со 6:3.

Во четвртиот сет и двајцата тенисери беа сигурни во своите сервиси се до петиот гејм кога Едмунд направи брејк и поведе со 3:2, но Димитров веднаш возврати и со добри сервиси дојде до водство со 4:3. Како и во двата претходни сета, во завршницата подобро се снајде Едмунд кој со брејк дојде до 5:4, a во наредниот гејм ја искористи првата меч топка и дојде до голема победа.

Едмунд во полуфиналето на Австралија Опен ќе игра против подобриот од дуелот меѓу Рафа Надал и Марин Чилич, кој се игра денеска со почеток во 9:10.