Гвардиола го пофали својот поранешен играч: Тој е поинаков, тој е еден од најголемите досега

Вo недела 34-годишниот Томас Милер испиша историјата со Баерн Минхен. Брилијантниот напаѓач ја испиша историјата на баварскиот гигант и стана играч со најмногу настапи во историјата на клубот.

Против Фрајбург по 710-ти пат го облече дресот на Баерн. За него во таа прилика проговори и Пеп Гвардиола, кој беше тренер на Милер во Баерн од 2013 до 2016 година:

“Нема играч како Томас Милер! Тој е еден од најголемите играчи во историјата на Баерн и фудбалот воопшто. Не само поради неговите многубројни титули, туку и затоа што е целосно фокусиран кога му треба на неговиот тим. Не е потценет. Фудбалските фанови од целиот свет знаат колку е важен на теренот. Тој е мудар, непредвидлив играч кој секогаш знае каде да оди.“

Милер целата своја клупска кариера ја помина во Баерн. Во дресот на клубот од Минхен забележа 710 настапи, 245 гола и 269 асистенции и освои 32 трофеи, од кои два Лигата на шампионите и 12 титули во Бундеслигата. Неговиот договор е со важност до летото 2025 година.