Вилијамс му се „молел“ на Деко за трансфер во Барселона, но добил „ладен туш“

Нико Вилијамс минатото лето беше пред потпис за Барселона, но се предомисли во последен момент и реши да не го напушта Атлетик Билбао. Шпанските медиуми пишуваат дека се покајал поради тоа и се обидел да го исправи, но кога го контактирал Деко сфатил „колку е часот“.

Барселона минатото лето немаше многу пари за доведување засилувања поради финансискиот фер-плеј, и беше јасно дека каталонскиот клуб може да доведе само едно звучно име.

Првата желба на спортскиот директор Деко беше Нико Вилијамс затоа што имаше намера на крилните позиции да бидат тој и Ламине Јамал исто како и во репрезентацијата на Шпанија на која минатото лето и донесоа титула на европски прваци.

Иако преговорите меѓу Барселона и Вилијамс водеа во вистинската насока и се очекуваше овој млад фудбалер да потпише за Каталонците, на крај се предомисли и одлучи да остане во Билбао. Тој со клубот од Сан Мамес потпиша нов договор и го задолжи дресот со број десет. Сметаше дека уште не е време да го напушти Атлетик Билбао, но набргу потоа се покајал.

Шпанските медиуми пишуваат дека на Вилијамс му е криво што го убедиле дека останувањето во Билбао е најдобрата опција и се кае што ја одби Барселона кога виде каква сезона имаше каталонскиот тим.

Исто така, се наведува дека Вилијамс сака да ја исправи таа грешка и наводно го контактирал Деко пред неколку дена кога слушнал дека Барселона сака да воведе крилен напаѓач и ја дал до знаење дека би сакал тој да биде нивниот избор.

Но, Деко не го заборавил тоа што Вилијамс му го приредил на Барселона минатото лето и како ги одбил кога сè веќе било договорено, па се заблагодарил на играчот на Атлетик за повикот и му порачал дека „возот поминал“ и дека од неговото доаѓање во Блауганата нема ништо.

Фото: Принтскрин