Шок во Турција: Почина тренер на Ефес

Серхат Гунеш ја изгуби најголемата битка во животот на 40 години, а турскиот гигант искажувајќи почит му оддаде последен поздрав.

Европската кошаркарска заедница беше потресена од тажната вест која дојде од Турција.

Серхат Гунеш, искусниот тренер за физичка подготовка на Анадолу Ефес и еден од највисоко ценетите професионалци во турската кошарка, почина по неколкунеделна борба за живот.

Гунеш во средината на мај се соочи со сериозни здравствени проблеми кои го однесоа на итна хоспитализација и го сместија на интензивна нега.

Од тој момент, тој водеше сериозна животна борба, додека лекарите без престан се трудеа да го стабилизираат неговото здравје. За жал, по неколкунеделната битка, пристигна оваа најгрозовита вест.

Смртта на Гунеш ја потврди и Анадолу Ефес, клубот каде што тој последните години остави посебен белег како дел од стручниот штаб. Истанбулскиот гигант се прости од својот колега со емотивна порака која ја допре целата кошаркарска заедница.

“Нашето срце е болно поради загубата на нашиот тренер за физичка подготовка, Серхат Гунеш, кој по неочекуваните здравствени потешкотии долго време се бореше за својот живот на интензивна нега. Му посакуваме Божја милост, а на неговото семејство сочувство и многу сила во овие тешки моменти. Ќе те чуваме во нашите срца, Серхат,” порачаа од Ефес.