Каван Саливан повторно беше во центарот на вниманието во МЛС, но по триумфот на Филаделфија Унион од 3:1 против Чикаго Фајр не беше расположен да зборува за личниот успех.
17-годишниот талент асистираше за првиот од двата гола на Бруно Дамијани на „Солџер Филд“ и со тоа стигна до историски учинок. Саливан сега има 21 учество во гол оваа сезона, односно седум погодоци и 14 асистенции, што е нов рекорд во МЛС за тинејџер во една сезона.
Во претходниот натпревар тој се израмни со Диего Фагундез и неговите 20 учества во гол од 2013 година, а сега и официјално остана сам на врвот.
Сепак, младиот Американец не беше задоволен од својата игра. Иако влезе во историјата, по мечот порача дека настапот му бил далеку од посакуваното ниво.
„Бев некако ужасен вечерва, па искрено не размислувам за рекорди и статистика. Среќен сум поради победата, но морам да се погледнам во огледало, да ја анализирам снимката и да видам што треба да поправам. Не сум задоволен од мојата изведба, но ова е голема победа“, изјави Саливан.
Според бројките, тој упати четири удари, не постигна гол и натпреварот го заврши со 75 проценти успешност во додавањата, односно 28 точни од 47 обиди.
Привремениот тренер на Филаделфија, Рајан Рихтер, имаше многу поинаков поглед на настапот на својот фудбалер.
„Изгледа дека секоја недела се појавува нешто ново кај него. Пресреќен сум за него. Важно е да продолжи да биде решавачки фактор на натпреварите, а кога придонесува со голови и асистенции како во последниот период, тогаш прави разлика. Неговата работна етика е одлична, креативноста е одлична, а сега е и навистина конкретен“, порача Рихтер.
Cavan Sullivan assists Bruno Damiani! Sullivan sets a new record for most goal contributions in a season by a teenager with 21 (and counting)! https://t.co/JOmCDuVwi0
— Major League Soccer (@MLS) October 15, 2026
Филаделфија е во одличен ритам и со овој триумф стигна до осма победа во низа. Тимот во моментов е шести во Источната конференција и има девет бода предност во однос на екипите кои се надвор од местата што директно водат во плејофот.
До крајот на регуларниот дел им преостануваат уште пет натпревари. На Унион им се потребни најмногу седум бода за место во првата рунда, а и четири бода би им биле доволни барем за вајлд-кард позиција.
Во Западната конференција, Сент Луис Сити го обезбеди своето место во плејофот и притоа испиша историја. По ремито без голови против Ванкувер Вајткепс, тимот стигна до 19 последователни натпревари без пораз во регуларниот дел од сезоната, со што го израмни апсолутниот рекорд во лигата.
Претходно таква серија имаа Колумбус Кру во 2004 и 2005 година, ФК Далас во 2010, како и Интер Мајами во 2024 и 2025 година.
Уште поимпресивно, Сент Луис сега има 21 меч без пораз во сите натпреварувања, што е најдолга таква низа во историјата на МЛС, подобра од серијата од 20 натпревари на Њујорк Ред Булс од 2016 година.
The longest unbeaten streak in MLS history… and counting. https://t.co/HSBRCufoPl
— Major League Soccer (@MLS) October 15, 2026
Тренерот Јоан Даме истакна дека зад бројките стои многу повеќе од статистика.
„Ова е повеќе од бројка. Тоа е гордост поради напорната работа со која се создава тој моментум, се одржува и се покажува конзистентност. Мислам дека токму тоа е една од најтешките работи во професионалниот спорт. Има причина зошто досега никој не го направил тоа“, изјави Даме.
Учество во игри на среќа е дозволено за лица со 18+ години. Играј одговорно!