Поништен црвениот картон на Антони, сепак ќе игра против Реал Мадрид

Дисциплинската комисија на Шпанската фудбалска федерација донесе одлука да го поништи црвениот картон на играчот на Бетис Антони. Тоа значи дека му е укината суспензијата и ќе игра на следниот натпревар против Реал Мадрид.

Бразилскиот фудбалер доби црвен картон на натпреварот против Гетафе минатиот викенд, но неговиот клуб се пожали на одлуката на судијата.

Откако ја прегледа снимката, Дисциплинската комисија на Шпанската фудбалска федерација одлучи дека нема елементи за црвен картон бидејќи Антони го допре Иглесијас без намера да направи прекршок.

„По прегледување на снимката, видливо е дека Антони постојано ја следи топката која ја контролира противничкиот играч, обидувајќи се со левата нога да пресече пат до топката. Комисијата заклучува дека во неговата акција нема намера за контакт со играчот на Гетафе, туку само обид да дојде до топката, иако на крајот не успеа“, стои во образложението.

Откако дојде од Манчестер Јунајтед во Бетис, Антони има одиграно шест натпревари и постигнато три гола со една асистенција. Поради тоа е номиниран за играч на месец јануари.