На Синер конечно му го поставија прашањето кое сите го очекуваа – не знаеше што да каже!

Измина речиси еден месец откако Јаник Синер го врати во тимот својот кондиционен тренер Умберто Фераро, кој беше во фокусот на допинг скандалот на Синер.

Италијанецот на една од прес-конференциите во Синсинати, објасни зошто се одлучил за таков чекор. Сепак, неговите зборови беа ограничени на професионалната перспектива, но на прашањето за надворешните перцепции на овој потег, не даде конкретен одговор.

Еве како изгледаше разговорот меѓу американскиот новинар Бен Ротенберг и светскиот број еден.

Ротенберг: Откако одлучи да го вратиш Умберто по година, се прашувам: дали навистина сакаше да ја прекинеш соработката со него на почеток? Или се каеш што ја прекина пред година?

Синер: Таа беше различна ситуација. Сега е сè поинакво. Почувствував дека сега ми треба некој кој подобро го познава моето тело, затоа што… но сè беше кажано во изјавата, така што е во ред.

Ротенберг: „Да го познава твоето тело“ – што точно значи тоа? Каква посебна експертиза или блискост има што може да ти помогне?

Синер: Работевме заедно околу две години пред овој прекин. Неговата работа ми донесе големи придобивки. Работевме на секој дел од моето тело: на подвижноста, стабилноста, а и издржливоста ми се подобри. Мислам дека направи одлична работа. И со Марко (Паники) се согласував добро, но можеби тоа не беше најсоодветниот избор. Со Умберто секогаш имав добар однос.

Ротенберг: Сметаш ли дека разбираш зошто некои луѓе беа изненадени од неговото враќање?

Синер: За тоа не би знаел што да кажам.