„Михаел Шумахер го знам со години, еве каков е тој навистина човек“

Легендарниот германски возач на Формула 1, Михаел Шумахер, е познат како неустрашив и понекогаш арогантен борец на патеките, но неговата најдобра страна се открива само во кругот на семејството, тврди неговиот долгогодишен пријател и поранешен шеф на операции во Ред Бул, Ричард Хопкинс.

Шумахер, седумкратен светски шампион, не е виден во јавноста од неговиот тежок скијачки инцидент во 2013 година, а деталите за неговата здравствена состојба остануваат строго чувана тајна. Хопкинс го запозна Шумахер на почетокот на 90-те, додека Шумахер возеше за Бенетон, а Хопкинс работеше како механичар во Мекларен.

Во разговор за британскиот „SunSport“, Хопкинс откри дека Шумахер имал и добри и лоши особини, но неговата страст за спортот била извонредна, често и на границата на ароганција.

– Беше самоуверен, можеби понекогаш и арогантен, но секогаш го носеше срцето на ракавот. Неговата посветеност и енергија ги тераа сите околу него да дадат повеќе. Најмногу ме фасцинираше неговиот менталитет – никогаш не застана, секогаш бараше повеќе од себе и другите – се сеќава Хопкинс.

Сепак, зад таа фасада на борбен шампион, Шумахер беше човек кој го сакаше своето семејство.

– Дома не беше тежок човек. Беше одличен татко и сопруг. Ако некогаш сте гледале Ф1 во периодот 2004–2005, можете да добиете впечаток дека е тоа фалбаџија возач со премногу самодоверба, но не беше така. Во приватниот живот беше сосема поинаков – вели Хопкинс.

Тој го спореди Шумахер со неговиот голем ривал, Мика Хакинен, познат како „Ладниот Финец“. Иако на Хакинен многумина не му припишуваа смисла за хумор, Хопкинс тврди дека и тој бил исклучително духовит и драг човек.

– Мика беше еден од најзабавните луѓе кои ги знам, иако во медиумите изгледаше ладен и резервиран. Шумахер имаше слична двојна личност – само на телевизија гледавте дел од него, додека поголемиот дел остануваше скриен – вели Хопкинс.