Играше за Манчестер Сити и англиската репрезентација, а сега банкротираше: „Спас” ќе бара во Саудиска Арабија

Поранешната ѕвезда на Манчестер Сити и националниот тим на Англија, Тревор Синклер, официјално банкротираше поради долг за данок, поради што заврши на суд.

Синклер, кој долги години играше во англиската Премиер лига за Манчестер Сити, Квинс Парк Ренџерс и Вест Хем, по завршувањето на кариерата работеше како аналитичар за спортски програми.

Во тој период не плаќал данок и казни. На суд заврши поради долг од 42.000 евра, натрупан за време на неговите активности на телевизија и радио од 2021 до 2022 година.

Како резултат на тоа, му беше наредено на Синклер да обезбеди средства или алтернатива за плаќање. Бившиот англиски репрезентативец не се појавил на судењето и бил прогласен за банкрот во негово отсутство.

Судијката Каролин Вилкинсон изјави дека судот не добил никаков контакт од поранешната фудбалска ѕвезда и заклучено било дека тој “не е способен да ги плати долговите на време”.

Порано, на Лондонскиот окружен суд, Синклер беше информиран дека му должи значајна сума, поради што даночните власти побарале да ги разреши долговите откако умрел неговиот сметководител.

Адвокатот на Синклер, Роберт Ли, претходно изјави дека поранешниот фудбалер работи во медиумите и сега прифаќа понуда за работа од Саудиска Арабија, што ќе ги реши неговите финансиски проблеми предизвикани од неплаќањето данок.

Во текот на својата кариера, Синклер одигра 12 натпревари за англиската репрезентација, вклучувајќи четири на Светското првенство во 2002 година. Тој постигна гол во 1997 година за Квинс Парк Ренџерс против Барнсли, што многумина го сметаат за еден од најубавите во историјата на ФА Купот.