Ѓоковиќ уште еднаш покажа колку е голем и во поразот: Не сакаше да одговори на едно прашање

Новак Ѓоковиќ не сакаше повредата да му биде причина за поразот од Валентин Вашеро во полуфиналето на мастерсот во Шангај.

Беше очигледно дека Ѓоковиќ има проблеми со левата нога, неговата подвижност беше значително ограничена, а побара и медицински тајм-аут.

Меѓутоа, кога новинарите го прашаа за неговата физичка состојба, кратко одговори:

„Следно прашање, ве молам“.

Новак очигледно не сакаше да користи оправдување за поразот од Вашеро, 204-тиот тенисер во светот, со резултат 6:3, 6:4.

„Сакам да му честитам на Валентин за пласманот во неговото прво финале на мастерс. Да се дојде до таму од квалификациите е неверојатна приказна. Му кажав на мрежата дека одигра фантастичен турнир, но уште повеќе дека неговиот став беше одличен. Играта исто така му беше извонредна. Сето тоа е негова заслуга. Му посакувам сѐ најдобро во финалето, а денес победи подобриот играч“, изјави Ѓоковиќ по својот 80. настап во полуфинале на еден мастерс турнир.

Вашеро, моментално на 204. позиција во светот, и стана тенисерот со најнизок ранг кој ќе игра финале на мастерс во историјата, а сега се предвидува дека ќе се искачи на 58. место.