Ивановски е седмо засилување за Охрид!

Македонскиот репрезентативец Мартин Ивановски и официјално се врати во редовите на ГРК Охрид, откако клубот го промовираше како седмо засилување за новата сезона 2026/27.

Дваесет и петгодишниот среден бек повторно ќе го облече дресот на клубот во кој ги направи своите први ракометни чекори. Тој потпиша едногодишен договор со можност соработката да биде продолжена и за сезоната 2027/28, а ќе настапува со бројот 34.

Ивановски во досегашната кариера, покрај Охрид, настапуваше и за Алкалоид и Пелистер 2, а со своите игри се избори и за место во сениорската репрезентација на Македонија.

По официјализирањето на трансферот, ракометарот не ја криеше радоста што повторно ќе игра во својот роден град.

„Навистина сум среќен што се враќам во клубот каде што започна мојата ракометна приказна. ГРК Охрид е тим кој континуирано напредува и од сезона во сезона ги подигнува своите амбиции, а освоениот европски куп е потврда за тоа. Верувам дека заедно ќе продолжиме да го развиваме клубот и дека ќе донесеме уште многу успеси и трофеи“, изјави Ивановски.