Не е добро: Легендарниот Луческу е во индуцирана кома!

Здравствената состојба на легендарниот тренер Мирча Луческу драстично се влоши, и според последните информации, тој се наоѓа во критична состојба на интензивна нега во Букурешт.

Министерот за здравство на Романија, Александру Рогобете, потврди дека ситуацијата е исклучително сериозна, истакнувајќи дека состојбата на поранешниот фудбалски селектор се влошила во последните 24 до 48 часа.

“За жал, тој е во критична состојба. Се наоѓа на интензивно лекување и неговата медицинска состојба значително се влоши во последните два дена”, изјави Рогобете за Антена 3.

Во саботата вечерта, Луческу беше пренесен на одделот за анестезија и интензивна нега откако неговите срцеви аритмии станале сериозни и не реагирал на терапијата. Според достапните информации, тој моментално е во индуцирана кома во Универзитетската итна болница во Букурешт.

Неговото семејство беше итно повикано во болницата, а меѓу првите кои пристигнаа беше и Михаи Стоичица, техничкиот директор на Фудбалската федерација на Романија.

Стоичица, видно потресен, изјави дека му е тешко да зборува за ситуацијата.

“Тешко е да се гледа низ што минува човек, особено кога сте имале посебен однос. Тој ми беше и ривал и пријател истовремено. Не можам да бидам ниту оптимист, ниту песимист, затоа што не сум доктор”.

Додаде дека немал можност да разговара со членови од семејството пред да дојде во болницата, но веднаш реагирал штом добил вест.

Состојбата на Мирча Луческу останува неизвесна, а лекарите упорно се борат за неговиот живот.