Нова криза во Ливерпул: Итна средба по елиминацијата од ФА купот

Притисокот врз Арне Слот во Ливерпул достигна врв по болното елиминирање од ФА купот од страна на Манчестер Сити. По крајот на натпреварот и резултатот 4:0, веднаш беше организирана итна средба.

Сезоната за Слот и неговите играчи тоне во темнина. Ливерпул практично е без шанси за титулата, додека, моментално на петтото место, мора да се бори дури и за учество во Лигата на шампионите.

Авантурите во ФА купот се завршија. Во саботата, Ливерпул се соочи со пораз од Сити.

Тој пораз доведе до итна средба. По последниот свиреж на стадионот Етихад, играчите на Ливерпул се собраа во соблекувалната на кризен состанок, пренесуваат многубројни британски медиуми.

Наводно, се дискутирало и за оставањето на Слот. Конкретниот исход од средбата сеуште не е познат. Поранешниот тренер на Реал и Бајер Леверкузен, Чаби Алонсо, веќе подолго време се споменува како потенцијален наследник за клупата на „црвените“.

По итната средба, капитенот на Ливерпул и холандската репрезентација, Вирџил ван Дајк, јавно се извини на фановите на својот клуб.

Ги разочаравме нашите навивачи, себеси и тренерот. Особено начинот на кој игравме во второто полувреме е болен за сите нас. Мене особено ми е тешко. Можам само да им се извинам на навивачите за она што го покажавме.
Вирџил ван Дајк

По елиминацијата од ФА купот, Лигата на шампионите останува последна шанса за спас на Слот, под услов да не биде сменет предвреме. В среда вечер, Ливерпул ќе го игра четвртфиналето против актуелниот шампион на Европа, Париз Сен Жермен.

Да потсетиме, овие два клуба се сретнаа и во осминафиналето на Лигата на шампионите минатата година, кога Парижаните беа подобри во двомечот против „црвените“ и подоцна го освоија престижниот трофеј.