Готово: Заврши сагата со Мато!

Според најновите информации што пристигнуваат од Шкотска, Вардар и Хартс постигнале согласност околу трансферот на Роџерс Мато.

Скопскиот клуб претходно ја одбил првата понуда од 350.000 евра, но шкотскиот прволигаш во меѓувреме ги договорил личните услови со напаѓачот од Уганда и веќе било извесно дека тој од лето ќе се пресели на „Тајнкасл“.

За да не остане без обештетување, Вардар повторно седнал на преговарачка маса, по што е постигнат договор Мато да замине во Шкотска уште во овој зимски преоден рок.

Во Хартс, Мато ќе ја има улогата на замена за Лоренс Шенкленд, капитенот и најдобар стрелец на тимот, кој се здоби со повреда и ќе отсуствува од терените меѓу шест и осум недели. Токму поради тоа, раководството на шкотскиот клуб инсистирало трансферот да се реализира веднаш.

Засега не се објавени детали за финансиската страна на договорот и сумата што Вардар ќе ја инкасира од продажбата на својот најдобар фудбалер.