Ниту статусот на легенда не го спаси: Шпанскиот великан го отпушти тренерот

Легендарниот поранешен фудбалер на Валенсија, Рубен Бараха, а од февруари минатата година и стратег на клубот од Местаља повеќе не е тренер на тој шпански прволигаш.

Ова го решија челниците на клубот по уште една лоша сезона и моменталното место на клубот на табелата во Ла лига. Валенсија одигра 2-2 на домашен терен против Алавес во неделата, спасувајќи се од пораз во судиското надополнување. Валенсија оваа сезона има само две победи во 17 настапи во шампионатот.

Има исто бодови како и последниот Ваљадолид, додека Еспањол на 18. место му бега на тој двоец за три бода.

Бараха во својата играчка кариера го носеше дресот на Валенсија од 2000 до 2010 година, а за шпанската репрезентација забележа 43 настапи и постигна седум гола. Пред Валенсија, 49-годишниот тренер ги тренираше шпанските клубови Елче, Рајо Ваљекано, Спортинг Хихон, Тенерифе и Сарагоса.

„За лошите резултати оваа сезона беше потребна одлука која беше тешко да се донесе. Сепак, целта на оваа одлука е да се сврти ситуацијата и да се постигнат подобри резултати“, соопштија официјално од Валенсија.