Изненадувачка изјава од тренерот на Ѓоковиќ: Надал ќе го победи Новак и ќе стигне до финалето на Ролан Гарос

Најдобриот светски тенисер Новак Ѓоковиќ синоќа лесно и убедливо избори пласман во второто коло на Ролан Гарос, го победи Јапонецот Нишиока со 3:0 во сетови.

Според проекцијата на ждрепката, доколку нема поголеми изненадувања, Новак Ѓоковиќ во четвртфиналето би требало да се сретне со својот најголем ривал Рафаел Надал, а актуелниот тренер на Новак Горан Иванишевиќ во интервју за париски „Л’Екип“ изјави дека тоа ќе биде најголемото четвртфинале во историјата на овој грен слем турнир.

Но, во таа прилика Иванишевиќ даде и една изненадувачка изјава, поврзана со исходот од потенцијалниот дуел Ѓоковиќ – Надал во Париз.

„Кога ја видов ждрепката,веднаш кажав дека Надал ќе стигне до финалето, што значи дека ќе го победи Новак. За мене има само еден фаворит на Ролан Гарос а тоа е Рафаел Надал! Дури и со повредата на стапалото што ја имаше во Рим“, изјави Иванишевиќ.

Звучи чудно, но намерата на Иванишевиќ можеби е да изврши мал притисок врз Надал со тоа што му ја додели фаворитската улога.