Милан му понуди директорско место на Малдини – се чека неговиот одговор!

Италијанските медиуми тврдат дека Паоло Малдини наскоро ќе се врати во својот матичен клуб, Милан, во улога на технички директор.

Веќе долго време се шпекулира дека новите кинески сопственици го сакаат Малдини во клубот, а сега стигна и официјална потврда за тоа.

Имено, новиот генерален директор на „росонерите“, Марко Фасоне имал средба со легендата на Милан и официјално му го предложил местото технички директор во клубот.

Малдини е спремен да се врати во својот матичен клуб, но го известил Фасоне дека ќе даде конечен одговор за неколку дена.

Медиумите се оптимисти дека легендата ќе ја прифати оваа функција, бидејќи со истата ќе има големи ингеренции во клубот и моќ за донесување одлуки.