Гатузо вака може да ги налути навивачите: Не е чудо што Динамо доминира 15-16 години

Tренерот на Хајдук, Џенаро Гатузо одржа прес-конференција за медиумите пред натпреварот од третото коло во хрватската лига каде што неговиот тим ќе го пречека Вараждин.

Во еден дел од прес-конференцијата Гатузо зборуваше за случувањата во клубот, а помеѓу нив беше и елиминацијата од квалификациите за Конференциската лига.

„Не е се црно во нашето испаѓање, ќе имаме повеќе сили да се посветиме на првенството“, изјави Гатузо по испаѓањето од Ружемборк.

Но, потоа го прокоментира и тимот на Сергеј Јакировиќ истакнувајќи дека не е случајно тоа што Динамо доминира во Хрватска.

„Ги гледав, секогаш ја следам конкуренцијата. Тие се тим со победнички менталитет, не е случајност што доминираат 15-16 години и секогаш играат во Европа. Ние со нашиот ростер не може да играме во две натпреварувања. Динамо е структуиран, има ростер и добри играчи. Во последните шест години како тренер во Европа видов дека е тешко да се играат два натпревари неделно“, изјави Гатузо.