Венгер: Новиот стил на живот е здодевен

Арсен Венгер по завршувањето на минатата сезона е слободен тренер и во моментов е без ангажман.

По 22 години поминати на клупата на Арсенал, Венгер минатото лето ја заврши својата кариера на „Емирати“ и одлучи да се одмори. Меѓутоа, изгледа дека овој начин на живот му е малку здодевен, барем така звучеше на последното интервју.

„Не се чувствувам како да сум во пензија, но ова веќе ме фрустрира и заморува. Јас по природа сум натпреварувач, таков човек сум и тоа ми недостасува во животот. Морам да признаам дека ми фали работата. Се разбира, не ми недостасуваат сите работите кои ги носи фудбалот, бидејќи убаво ми е без оној притисок кој го носев долго време. Но, не го завршив своето. Луѓето ве отпишуваат кога ќе дојдете во некои позрели години, но јас ќе продолжам се додека имам апетит за живот и за фудбал“, изјави Венгер.

Арсен Венгер, чија тренерска кариера траеше повеќе од 35 години додаде дека нема никаков контакт со Милан, иако неодамна се шпекулираше за тоа дека би можел да го превземе италијанскиот гигант.