ПМФЛ: Пукна „петарда“ во Тетово, Фелипе со евро-гол му донесе победа на Вардар

Денес со почеток од 15:30 на македонските терени се одиграа натпреварите од шестото коло во првата македонска фудбалска лига.

Во натпреварот кој Вардар го одигра на стадионот „Борис Трајковски“,успеаа да запишат победа против тимот на Ренова. Вардар славеше со резултат 2:1. Вардар до предност дојде во 26 минута од средбата преку Тигран Барсегјан, но до крајот првиот дел гостите успеаа да изедначат и тоа преку Рамадани во 40 минута. Домаќините во вториот дел го засилија темпото, се играше пред голот на Кобетиќ, а таквата иницијатива на Вардар беше посебно засилена во последните петнаесетина минути. Барсејган имаше прилика да го постигне и својот втор погодок, но неговиот удар од далечина заврши само во пречката. Но, Хуан Фелипе не погреши, Бразилецот со евро-гол во 83 минута успеа да донесе важна победа за неговиот тим.

Тетовска Шкендија стигна до нова убедлива победа на домашен терен, поразен беше тимот на Силекс со убедливи 5.:0. Хет-трик за Шкендија во овој натпревар постигна Емини. Со оваа победа домаќинот стигна и до петата победа во сезоната, единствен натпревар во кој клубо од Тетово не успеа да стигне до трите бода беше натпреврот против Победа кој заврши со резултат 3:3.

Тимот од Струмица, Академија Пандев, продолжува да прикажува сосема солидни настапи, тие на досегашните шест натпревари во првенството забележаа три победи, две нерешени средби и само еден пораз и тоа од моменталниот лидер на табелата, тетовска Шкендија. Последна жртва на Струмичани беше битолски Пелистер. „Пандевци“ во овој натпревар запишаа победа од 2:0.

Тимот на Работнички успеа да ја запише првата победа. „Романтичарите“ во првите пет кола не успеваа да стигнат до посакуваните три бода и токму поради тие пред ова коло се наоѓаа на последното место на табелата, а во денешниот натпревар против Победа во Прилеп со пресврт стигнаа до победата. Прилепчани рано уште во 4 минута стигнаа до предност преку Гешовски, а водство го зголеми Филип Најдовски со голот на 15 минути до крајот на првиот дел. Во вториот дел гостите од Скопје како да се разбудија и започнаа да прикажуваат подобра игра, а тоа се исплатеше. Во 58 минута Кире Маркоски погоди за намалување на предност, за само шест минути подоцна Сахити да израмни на 2:2. Маркоски со својот втор погодок донесе целосен пресврт, за конечните 2:4 да ги постави Жефри – Чинеду.

Во скопската пресметка на стадионот во „Чаир“, Шкупи беше подобар од Скопје со резултат 1:0, единствениот погодок на натпреварот беше дело на Кристијан Стојкоски во 23 минута од средбата.