Официјално: Федерер се повлече од Ролан Гарос

Роџер Федерер се повлече од Ролан Гарос и нема да игра во осминафиналето против Матео Беретини, потврди швајцарскиот тенисер.

Федерер играше до 1 часот по полноќ и по победата против Германецот Копфер најави дека размислува за повлекување од турнирот.

„Откако разговарав со тимот, решив да се повлечам од Ролан Гарос. По две операции на коленото и над една година рехабилитација, важно е да го слушам моето тело и да не претерувам на патот кон целосното закрепнување. Воодушевен сум што одиграв три натпревари. Нема подобро чувство отколку да се вратиш на теренот“, изјави Федерер.

Целта на Федерер е да биде максимално подготвен за Вимблдон, кој се игра од 28 јуни до 11 јули, па тој не сакал да ризикува влошување на здравствената состојба и поради тоа се повлече од Ролан Гарос.