Нејмар: Меси и Роналдо? Не сакам да зборувам за нив!

Бразилскиот фудбалер Нејмар изјави дека не се чувствува пријатно кога го споредуваат со соиграчот од Барселона Лионел Меси и ѕвездата на Реал Мадрид, Кристиано Роналдо.

Меси и Роналдо во последната деценија доминираат во светскиот фудбал, а во прилог на тоа оди и фактот дека заедно освоија девет од последните десет „Златни топки“.

Нејмар, кој оваа година беше трет во изборот за „Златна топка“ многумина го сметаат за фаворит за следната титула, но Бразилецот вели дека тоа не го интересира и дека само сака да биде подобар.

„Тоа е една работа за која не ми е пријатно да зборувам. Навистина не го сакам тоа. Роналдо и Меси се двајца феноменални фудбалери, кои последните десетина година играат на високо ниво. Им се восхитувам и секојдневно работам да стигнам до тоа ниво“, изјави Нејмар.

„Лео е најдобриот фудбалер со кој сум играл некогаш, константно учам од него. Не знам дали е вистинското време или не, но само сакам да бидам подобар секој ден. Сакам да напредувам и не сакам да бидам подобар од било кој друг фудбалер, туку само од самиот себе си“, нагласи Нејмар.