Вујовиќ експресно доби отказ во Хрватска, но и суспензија од три месеци

Поранешниот тренер на Вардар, Веселин Вујовиќ поради лошите резултати доби отказ во хрватскиот клуб Нексе.

Вујовиќ на клупата на Нексе седеше само два месеци и откако не успеа да ги донесе очекуваните резултати клубот одлучи да му врачи отказ.

„Раководството на Нексе и тренерот Веселин Вујовиќ одлучија да ја прекинат соработката“, објави Нексе.

На табелата Нексе ризикува да го изгуби и второто место бидејќи по осум одиграни кола има ист број на бодови со Сесвете. Во последниот натпревар на кој Вујовиќ седеше на клупата Нексе ремизираше 28:28.

Исто така Вујовиќ доби забрана за извршување на тренерската функција од три месеци поради големиот инцидент кој се случи на мечот меѓу Нексе и Загреб одигран на почетокот од април.