Во „Адидас“ мислеле на се: Со Јунајтед потпишале посебни клазули за – испаѓање од Премиер лигата!

Манчестер Јунајтед оваа сезона е многу поблиску до испаѓање од Премиер лигата отколку до пласман во Лигата на шампионите. На 14-то место имаат 22 поени, само седум повеќе од Ипсвич, кои се во зоната на испаѓање. Испаѓањето само по себе би било катастрофа за клуб со таква традиција и реноме, но освен парите од Премиер лигата, Јунајтед во тој случај би можел да остане и без стотици милиони евра од договорот со добавувачот на опрема.

Црвениот клуб од Манчестер долго време соработува со „Адидас“, а во јуни 2023 година потпишаа десетгодишно продолжување вредно 900 милиони фунти или една милијарда и 86,5 милиони евра. Но, „Телеграф“ пишува дека германската компанија има право да го раскине договорот доколку Јунајтед идната сезона игра во Чемпионшип.

Инаку, договорот би можел да биде раскинат дури по една година, но „Адидас“ има право таа сезона да ги намали исплатите за 50 проценти, доколку Јунајтед не игра во Премиер лигата. Освен тоа, „Адидас“ намалува 10 милиони фунти (12 милиони евра) за секоја сезона во која Манчестер Јунајтед не влезе во Лигата на шампионите, па во наредната сезона наместо предвидените 90 можат да добијат само 35 милиони фунти (42 милиони евра), а потоа повеќе ништо од останатите седум години.

Огромни пари Јунајтед би изгубил и од учеството во Премиер лигата со испаѓањето. Иако минатата сезона завршија како осми, добија 48,9 милиони евра (шампионот Сити 75,2 милиони), додека клубовите кои испаѓаат добија максимално 11,3 милиони, а сега се осудени на многу скромна распределба во Чемпионшип.

Јунајтед крајот на октомври го смени тренерот Ерик тен Хаг и за нов тренер го назначи Португалецот Рубен Аморим, но тој во првите осум натпревари освои само седум поени. Така, на половина од сезоната, клубот е само на 14-то место со шест победи, четири ремија и девет порази во 19 кола.