Познато колку ќе паузира Олмо: Еве колку натпревари пропушти во последните две години

Дани Олмо во 23-тата минута на натпреварот Барселона – Осасуна (3:0) го постигна вториот гол и на тој начин го водеше домаќинот до важна победа. Барселона со славење во заостанатиот натпревар од Ла Лига, десет кола пред крајот на сезоната, сега е на првото место со три бода повеќе од актуелниот првак Реал. Но, Олмо и Барселона не слават бидејќи сјајниот офанзивец се повреди четири минути по постигнат гол и мораше да биде заменет.

Тренерот на Барселона, Ханси Флик, беше видливо лут поради повредата на важниот играч, покажаа камерите кога се виде дека Олмо не може да продолжи. По натпреварот откри дека Олмо ја повредил препоната и дека нема да игра барем две недели, а можеби и три.

Тоа значи дека Олмо ќе пропушти најмалку два важни натпревари – возвратната полуфинална средба од Копа дел Реј против Атлетико Мадрид, по 4:4 во првиот натпревар, и првиот четвртфинален натпревар од Лигата на шампионите против Борусија Дортмунд. Флик се надева дека Олмо ќе се врати за возвратот во Дортмунд, но не би било чудно да не игра ниту на тој натпревар.

Олмо во последните четири сезони поради различни повреди вкупно пропуштил дури 75 натпревари. Оваа сезона, откако се врати во Барселона, пропуштил 13. Сега таа бројка ќе се зголеми за најмалку уште пет натпревари, бидејќи освен споменатите средби против Атлетико во купот и Борусија во ЛШ, Барселона во наведениот период игра уште против Жирона, Бетис и Леганес во првенството.