Пелистер со реакција: Федерацијата треба да биде „мајка“ за сите

Овој викенд на програмата е последното коло од основниот дел во Првата кошаркарска лига, а пред натпреварот со ТФТ со реакција се огласи екипата на Пелистер.

Во соопштението битолскиот клуб прашува зошто КФСМ ги толерира долговите на одредени клубови.

„Како клуб кој три години по ред играше финале во плејофот, максимално сме разочарани од игнорантскиот однос на луѓето од КФСМ кои не најдоа за сходно да одговорат на нашето барање, кое е особено важно ако се знае дека веќе од следната седмица ќе почнат плејоф битките, во кои логично е сите да влезат со ист третман од федерацијата која треба да се грижи за фер натпреварување, што за жал не е случај во Македонија. Имено, КК Пелистер уште на состанокот на Здружението на прволигаши одржан уште пред завршниот турнир од Купот на Македонија, беше донесена конечна одлука – даден рок од седум дена за сите клубови целосно да ги подмират долговите кон федерацијата, за кои самото раководство уште во месец септември 2024 се пожали дека ја надминува границата од 200.000 евра (сума што во период на зачестени казни кон клубовите е можно да биде и дополнително зголемена).

Во меѓувреме беше одигран завршниот турнир од Купот на Македонија, како и неколку прволигашки рунди, па како клуб што отсекогаш бил со чисти сметки, сметаме дека е логично да се постави прашањето – дали „правилата за игра“ важат подеднакво за сите или некој (не)намерно го прави ова првенство нерегуларно. Ставот на КК Пелистер е јасен – досега беше дозволувано индиректно „кредитирање“, па клубовите наместо да ги плаќаат големите долгови кон федерацијата, решаваа тие пари да ги насочат кон носење на нови засилувања, со што директно се влијаеше врз резултатите на одредени екипи во важен дел од сезоната.

За сериозниот проблем предупредивме повторно пред две седмици, со писмо со кое баравме ние како клуб, но и целокупната јавност да биде известена за состојбата околу (не)плаќањето на одредени клубови кон федерацијата.  Добивме ветувања кои останаа само празни зборови, од „куќата на кошарката“ повторно се молчи за важни прашања кога станува збор за прволигашка кошарка, додека сила се демонстрираше врз одредени второлигаши, од причини само познати на раководството во заминување.

КК Пелистер не планира да молчи… отворено баравме да се подобрат условите за кошарка за потопли сали и услови за игра… сега повторно гласно бараме еднаков третман, нешто што би било сосема нормално во секоја друга држава, за жал не и овде.  Првата лига завршува викендов, потоа почнува плејофот, ние не знаеме со кого ќе се сретнеме во доигрувањето, тоа и не е важно во моментов. Она што е клучно е да се влезе со егал-однос на сите клубови кон федерацијата и конечно еднаш и засекогаш да престанат сите повластици што некој ги имаше и ги злоупотребуваше.

КФСМ треба да биде „мајка“ за сите клубови, без разлика кој е на чело на федерацијата и кој ги води клубовите. Во „куќата на кошарката“ егото не смее да ја надвладее желбата сите заедно да одиме напред, нешто што очигледно е сериозен проблем на оние кои ја водат федерацијата. Сакаме само отворање на картите што од некоја причина толку упорно се кријат под тепих. И ќе продолжиме да инсистираме на добивање на одговори… се за доброто и за равојот на македонската кошарка“, стои во соопштението од Пелистер.

Фото: КК Пелистер