Навивачите во Англија бесни: Сакаат укинување на ВАР!

Големо истражување спроведено од Здружението на фудбалските навивачи (ФСА) откри дека три четвртини од навивачите на англиската Премиер лига не се согласуваат со користењето на видео асистентот за судии (ВАР). Анкетата опфати речиси 8000 навивачи, а 90 проценти од нив сметаат дека воведувањето на технологијата не го подобрило искуството на денот на натпреварот. Дополнително, 91 процент веруваат дека ВАР ја нарушил спонтаноста на прославувањето на головите.

Анкетата во себе ги вклучи навивачите на сите 20 клубови од првата лига, најмногу редовни посетители на натпреварите, од кои повеќе од половината присуствуваат на најмалку 15 натпревари по сезона. Резултатите, исто така, покажуваат дека 94 проценти од испитаниците не сметаат дека ВАР го направил гледањето фудбал на телевизија попријатно, 72 проценти не мислат дека ВАР обезбедил попрецизно судење, а 74 проценти тврдат дека објаснувањата на одлуките донесени со помош на технологијата не се јасни.

“Резултатите јасно покажуваат дека мнозинството од навивачите сакаат укинување на ВАР,” изјави за BBC Sport Тома Конканон, менаџер за мрежата на Премиер лигата при FSA. “Доволно долго живееме со ВАР за да го забележиме неговото негативно влијание врз играта. Луѓето се лути поради времето кое се губи, поради прецизноста и уништената спонтаност. Тоа ја одзема самата суштина на фудбалот и на тие посебни моменти.”

Премиер лигата, како одговор на резултатите од анкетата, истакна дека е свесна за важноста на намалување на влијанието на ВАР врз искуството на навивачите. “Во рамките на постојаниот дијалог со навивачите, истражувањето на Премиер лигата покажува дека тие во поголем број поддржуваат задржување на ВАР, но со подобрувања во неговото користење,” стои во соопштението.

Од лигата додадоа: “ВАР носи повеќе исправни одлуки. Во последните сезони, имаше околу 100 исправни интервенции на ВАР по сезона, каде голови би биле неправилно признаени или поништени, или би се испуштиле или погрешно досудени црвени картони и пенали. Лигата применува висок праг за интервенција на ВАР, каде што теренската одлука на судијата има приоритет. Затоа ВАР е помалку наметлив во Премиер лигата отколку во другите европски лиги, вклучувајќи ја и Лигата на шампиони каде интервенциите се речиси двојно почести.”

И покрај спротивставувањето на навивачите, мала е веројатноста дека ВАР ќе биде укинат од Премиер лигата. Во 2024 година дури 19 од 20 клубови гласаа за задржување на технологијата, а само Вулверхемптон беше против. За укинување на ВАР потребно би било 14 од 20 клубови да гласаат против него.