Јувентус не бил во толку долга негативна серија повеќе од 15 години

Тимот на Јувентус претрпе пораз со минимални 1:0 доцна синоќа од Реал Мадрид на “Сантијаго Бернабеу” во Лигата на шампионите и на тој начин ја продолжи својата исклучително негативна серија од девет последователни натпревари без победа.

Фудбалерите на Игор Тудор одиграа нерешено во пет натпревари и изгубија двапати во последните седум натпревари во Серија А и Лигата на шампионите, што е нивната најдолга серија без победа во сите натпреварувања од периодот април и мај 2009 година, кога под водство на Клаудио Раниери не успеаја да победат во осум натпревари, во кои забележаа шест нерешени и два порази. Ова достигнување може да биде израмнето уште за време на викендот, кога фудбалерите на “старата дама” ги очекува тешко гостување кај Лацио.

Последната победа на Јуве беше на 13 септември, кога со 4:3 беше поразен Интер. Во медиумите во Италија веќе сè повеќе се шпекулира дека токму оваа средба може да биде одлучувачка за иднината на Игор Тудор на чело на Јувентус и тој може да биде отпуштен, ако се запише нов негативен резултат.

“Бјанконерите” моментално се наоѓаат на седмото место во Серија А со 12 бодови од седум натпревари во првенството. До сега тие имаат освоено три средби, во три натпревари одиграле нерешено и имаат само еден пораз. Тие се на четири бодови од врвот, кој моментално е окупиран од Милан со 16 бодови. Интер, Наполи и Рома пак имаат по 15 бодови и ги заземаат следните три места на табелата.