Големото дерби во Битола викендов под рефлектори!

Во рамки на деветтото коло од Првата македонска фудбалска лига, Пелистер на 6 октомври од 18 часот ќе ја пречека Шкендија. Дуелот ќе се игра под светлината на рефлекторите на стадионот „Петар Милошевски“ во Битола.

„Зелено-белите“ се наоѓаат во сериозна резултатска криза со пет последователни порази, а токму против актуелниот шампион и учесник во Конференциската лига ќе се обидат да ја прекинат негативната серија и да се претстават во подобро светло пред својата публика.

Во истото коло, дуелот меѓу Шкупи и Работнички ќе се одигра во Струга, откако Фудбалската федерација на Македонија го суспендираше теренот во Чаир. Овој натпревар е закажан за 4 октомври со почеток од 15 часот.