Од париско гето, петта лига до Театарот на соништата!

Името Висам Бен Једер ретко се наоѓа на насловните страни на угледните спортски магазини, па иако синоќа блесна на најголема сцена, неговиот сјај го „замаглија“ некои други.

Бен Једер синоќа влезе во игра во 72-та минута против Манчестер Јунајтед на „Олд Трафорд“, па на 28-годишниот напаѓач потребни му беа само шест минути за да постигне два гол и да ја однесе Севиља во четвртфиналето од ЛШ.

За жал, тема на денот денес е дебаклот на „црвените ѓаволи“, а не успехот на Севиља, па двата гола на Бен Једер останаа во сенка на лошата партија на скапите ѕвезди на Јунајтед.

Вториот стрелец во Лигата на шампиони оваа сезона со осум постигнати гола Бен Једер својот животен пат го почна во еден сиромашно предградие на Париз по име Сарчелес.

Фудбалот за него од мали нозе претставуваше бегство од тешкото детство, исто како што беше тоа и за неговиот голем пријател Ријад Марез.

Професионалниот фудбал беше далеку за Бен Једер, а занаетот го учеше играјќи футсал во тимот на Дижон, со кого како 20-годишно момче стигна до второто место во француската Футсал лига. Запиша и два настапи за француската футсал репрезентација, а потоа доби шанса да се проба со „голем“ фудбал во петтолигашот Алфортвејл.

Потоа Бен Једер добива вистинска шанса во Тулуз, каде набрзо прераснува во ударна игла на тимот и го престигна Жињак како најдобар стрелец на овој клуб во 21-от век. После постигнати повеќе од 60 гола за Тулуз, Бен Једер во 2016 година прави трансфер во Севиља.

Бен Једер е син на емигрант од Тунис и веќе три пати го одбиваше повикот од репрезентацијата на оваа земја. Со тоа тој го одби и настапот на Мундијалот во Русија со оглед на фактот дека Тунис се пласираше на СП.

Сепак, Вен Једер има само една желба – место во репрезентацијата на Франција, својата родна земја, иако тешко е да се поверува дека ќе добие повик од Дешамп.

После фантастичната претстава на Театарот на соништата, можеби и навистина ќе му се оствати сонот да го облече дресот на „триколорите“.