Масара отвори важна тема: Јувентус и Серија А мора да трошат „поинаку“

Фредерик Масара пред натпреварот со Лацио зборуваше не само за мечот, туку и за пошироката слика околу Јувентус и италијанскиот фудбал.

Функционерот на „старата дама“ нагласи дека во моментов клубот не е фокусиран на зимскиот преоден рок, иако во јавноста веќе има приказни дека тренерот Лучано Спалети посакува уште еден класичен напаѓач.

„Имаме уште многу време до јануари, а во нападот го имаме и Ехатор“, изјави Масара.

Тој додаде и дека варијантата со двајца напаѓачи останува отворена.

„Игра со двајца напаѓачи е опција. Коло Муани почнува вечерва, а можно е да играат заедно во текот на натпреварот“, посочи Масара.

Јувентус вечерва го пречекува Лацио, а Масара го оцени дуелот како важен и од аспект на континуитетот.

„Ова е важен натпревар затоа што сакаме конзистентност и во пристапот“, порача тој непосредно пред почетокот.

Во меѓувреме, Спалети нема да биде на клупата поради суспензија од еден натпревар, па тимот ќе го води неговиот помошник Марко Доменичини.

Сепак, најсилната порака од Масара беше поврзана со трансфер-пазарот и положбата на италијанските клубови.

„Минуваме низ специфичен момент на меѓународниот пазар, а ситуацијата за италијанскиот фудбал е уште полоша“, изјави Масара.

„Помалку сме конкурентни од другите лиги, па затоа мора да инвестираме поинаку. Треба да се навикнеме да бидеме покреативни во пронаоѓањето ефикасни решенија“, додаде тој.

Овие зборови доаѓаат во момент кога Јувентус има 11 бодови по шест кола во Серија А, со девет постигнати и пет примени голови.