Сите зборуваат за Тотенхем, но во Шпанија се подготвува уште поголема катастрофа!

Фудбалската сезона која привршува може да ни донесе неверојатни приказни од двете најсилни лиги во светот.

Се зборува за Тотенхем и неговата битка за опстанок, исто како и можноста Вест Хем да се пресели во Чемпионшип (една од двете лондонски екипи мора да испадне). Меѓутоа, некако зад сцената се одвива состојбата во Севиља во шпанската Ла Лига, која не е ништо подобра од онаа во која се наоѓаат споменатите екипи од Премиер лигата.

Севиља е вистински фудбалски феномен на 21-иот век, екипа која без огромни инвестиции стана најдобра во “вториот ешалон” на европскиот фудбал и дури седум пати ја освои Лига Европа од 2006 до 2023 година, што е апсолутен рекорд во тоа натпреварување.

Во Шпанија таа долго време беше можеби и четвртата сила, зад недостижното трио Реал Мадрид-Барселона-Атлетико, но последните години, некаде од 2023 и последната титула во Лига Европа е во “слободен пад”, кој оваа сезона би можел да заврши со напуштање на прва лига и пад во Сегунда.

Во последните 12 кола на Ла Лига, Севиља победи само два пати, вчера загуби од Осасуна во Памплона со 2:1 и по 33 одиграни кола падна под цртата, моментално е 18-та со 34 бодови.

Сè уште ништо не е загубено, остануваат уште пет кола до крајот, половина од лигата се бори за опстанок, Рајо Ваљекано на 11-тото место има само пет бодови повеќе, но проблемот е што Севиља изгледа многу слабо, што екипата е премногу несигурна и не изгледа подготвена да избегне страшно сценарио.

Распоредот на Севиља е следен: Реал Сосиедад и Еспањол дома, Виљареал на гости, Реал Мадрид дома и на крајот Селта на гости.

Јасно е дека следните два натпревари на домашен терен се клучни и дека е неопходно да се земат сите шест бодови. Во спротивно, паниката ќе достигне врв…

Доколку Андалузијците “преживеат”, ќе мора да се прегледаат сите опции во текот на летото и да се преиспита нивното работење во последно време.

Очигледно е дека скаутинг службата повеќе не го работи својот дел како што треба, зашто клубот живееше од тоа, постигнуваше добри резултати и големи продажби по пристапно купени играчи.