Родри му се извини на Бернардо Силва по инцидентот на СП

Шпанскиот репрезентативец Родри јавно се извини на Бернардо Силва по победата на Шпанија над Португалија во осмина-финалето на Светското првенство. Напнатостa меѓу двајцата поранешни соиграчи од Манчестер Сити се случи во најдраматичните моменти од натпреварот, а Родри во микс-зоната на стадионот во Далас ја призна својата грешка. Иако беше прогласен за играч на натпреварот, најпрво сакаше да ги реши недоразбирањата со португалскиот играч.

Целата случка се одигра во завршницата на мечот, непосредно откако Микел Мерино ја доведе Шпанија во водство. Бернардо Силва, новото засилување на Реал Мадрид, пропушти чиста прилика со глава за израмнување, а Родри го прослави неговото промашување бурно, што доведе до силна реакција од Силва, кој со прст го укори за таквото однесување.

Извинување и покрај наградата за играч на натпреварот

Иако малата расправија на теренот брзо беше заборавена по последниот свиреж на судијата кој го потврди пласманот на Шпанија во четвртфиналето, Родри почувствува потреба јавно да се огласи.

“Прво, сакам да се извинам затоа што не постапив правилно спрема мојот соиграч. Инстинктивно го прославив негово промашување, што беше погрешно од моја страна. Тој ми прости, а јас се извинувам уште еднаш“, објасни шпанскиот врскаш.

И покрај тоа што беше официјално прогласен за најдобар играч на натпреварот, Родри сметаше дека наградата ја заслужи стрелецот на победничкиот гол. “Кога влегуваш од клупата со таков став, ти си играч на натпреварот. Јас би му ја дал наградата нему. Трудот на целиот тим беше за паметење“, заклучи Родри, пофалувајќи го Микел Мерино.