Рома и Комо се приближуваат: Милан од борба за Скудето до останување без Лига на шампиони?

Фудбалерите на Милан се на добар пат да ја уништат сосема солидната сезона.

Пред само еден месец, тимот на Масимилијано Алегри сè уште беше во борбата за Скудето, а сега ќе мора да стравува за пласман во Европа до крајот на сезоната.

Милан победи само еднаш во последните пет натпревари, претрпе три порази и со освоени четири бода во месецот, сериозно го закомплицира учеството не само во Лига на шампиони, туку и во Европа.

Милан има ист број бодови како и Рома – 67, Комо ги следи со два помалку, додека третопласиран Јувентус има 68, а Наполи е втор со 70. Сè уште е отворено, Милан може на крај да биде и втор, меѓутоа, ниту еден тим од врвот на Серија А не падна толку многу во клучниот период на сезоната.

Вистина е дека и Наполи не блика откако остана без шанси за Скудето, но освои двојно повеќе бодови отколку Милан во последниов месец, а и го има својот натпревар од ова коло вечерва против Болоња. Сето ова најмногу го искористи Рома, која освои 13 од можните 15 бодови во последните пет натпревари и “волчицата” има голема шанса на крајот да го прескокне Милан.