Пелистер се пофали со големо засилување: Го „украде“ Серафимов од Алкалоид!

Актуелниот шампион во ракомет, Еурофарм Пелистер, денеска и официјално го потврди едно од најголемите засилувања за наредната сезона – ангажманот на македонскиот репрезентативец Мартин Серафимов, кој пристигнува од тимот на Алкалоид.

Од битолскиот клуб преку социјалните мрежи информираа дека десниот бек, кој има значајна улога и во националниот состав, ќе се приклучи од сезоната 2026/27. Серафимов потпиша договор на две години и се очекува да биде важен адут во остварувањето на амбициите на „пелистерци“.

„Нашиот клуб секогаш бил асоцијација за македонската репрезентација и во секој успех вградил многу свои членови и протагонисти. Затоа секој потпис на македонски репрезентативец многу ни значи. Денес го официјализираме како наш нов член Мартин Серафимов, десниот бек на националниот тим. Тој потпиша двегодишен договор со Еурофарм Пелистер и од сезоната 2026/27 ќе му се стави на располагање на стручниот штаб“, соопшти Пелистер.

Пред ангажманот во Алкалоид, Серафимов го носеше дресот на Металург, а неговото доаѓање во Битола се очекува на почетокот на јули, кога тимот ќе ги започне подготовките за новата сезона.